საჩონგურო მწყემსური სიმღერა

 

ტბიდან ნისლი გამოვიდა,

ბევრი იტირა...

- რა გატირებს, ნისლაურა,

თეთროსანო, რა?

გულის ძველი ნაეკლარი? -

არაფერი თქვა...

ყელზე ლეჩაქს იწეწავდა,

თავს ახლიდა ქვას?

კლარჯეთზე გადაიარა,

ჭანეთს გავიდა.

შავად ჩავიდა შავ ზღვაში,

ახლაც იქა დგა.

- ნისლო, ნისლო, ნისლაურა,

ძმას უთხარი, დას:

- თვალს ნუ ითხრით, საყვარლებო,

გულს ნუ ილეწავთ,

სიხარულის მზე ამოვა

დღეს თუ არა, ხვალ!

ტურფაა შავშეთ-კლარჯეთი,

ანჩა, ოპიზა!

მუდამაც ის გზა ჰქონიათ,

სითაც მტკვარს აქვს გზა!


1945 წ.