დალალები... დალალები...

ჩემს ხელში ვინ მომიქუჩებს?

დანანებით, დანანებით,

მე შევყურებ მარწყვის ტუჩებს.

რა ვნახე და რა ვიპოვე

კოცნა მწყურის და ამბორი.

თუ არ გინდა სიახლოვე,

რაღად გინდა ყოფნა შორით.

მომაწოდე ტუჩის ლალი,

გაზაფხულის ნაბრწყინვალი,

უკვდავების ღვინოდ შევსვა

შენი კოცნის ნაპერწკალი!

დალალები... დალალები...

ეგ სიმდიდრე სად ვიშოვე?

გულში სევდა გადაზღვავდა,

ვაჰ, სიშორევ!

ეჰ, სიშორევ!